Хүү, Кетчуп хоёрийн надад бичсэн сэтгэгдэл 2 өөр өнцгөөс юмыг харах боломжийг олгож байна. Тун зүгээр энэхүү сэтгэгдлүүдийг залуустааа толилуулъя гэж бодлоо. Уншаад үзээрэй тун зүгээр шүү. Эвлүүлэг нэмэлт хачиргүй шууд л хийсэн болно.
Хүү: Анддаа гэж хэлэхэд нэг байтугай нэлээн хэдэн эмэгтэйг ч, нэг цэцэрлэгийн анги шиг хүүхэдтэй болсон ч хайрлаад явах зүрхтэй залуу минь битгий ай.
Мэдээж бидний өмнө хариуцлага тулж ирнэ. Гэвч бид даваад гарч чадна. Чи ямар ганцаараа зүтгэх биш, та 2 хамтдаа зүтгэнэ. Байргүй машингүй бол яадаг юм бэ хашаанд байшин барья, болохгүй бол бас нэг хос найзтайгаа 4-үүлээ 1 өрөө байр хуваагаад хөлсөлчий. Яаж ийгээд болноо андаа. Амьдралын дарсыг гашуун ч бай, чихэрлэг ч бай хамтдаа л амсаад явбал сайхан.
Хэт хөгширсөн хойноо өөрөөсөө олон дүү эхнэр авах аль аль талдаа хэцүү шүү. Амьдрал дээр батлагдсан зүйл. Хөгширчихөөд өөрийн үеийн эхнэр авлаа гэхэд анхны хүүхэд гаргахаас эхсүүлээд хэцүү... Физиологийн хувьд ч бие махбодь гэдэг чинь хуучирч элэгддэг зүйл... Бид хэт өөрснийгөө барьж хорьж болохгүйэ. Гэхдээ яарах хэрэггүй гэдэг үнэн ч санаанд нийлсэн хүн гараад ирвэл яагаад ч алдаж болохгүйээ.
Эхнэр хүүхэдтэй боллоо гээд бусдыг огт хайрлахаа больчихно гэсэн үг биш шүү дээ. Бага зэрэг халамж суларч болох ч гэр бүлээрээ ээж аав дээрээ очоод, эмээ өвөө дээрээ гүйж очоод байж болно. Харин ч ачийг нь тэврээд очиход юу юунаас илүү бэлэг, юу юунаас илүү хайр болох байхаа... Чамайг сайхан эхнэртэй, сайн сайхан амьдарвал ээж чинь, найз нөхөд чинь бүгд л баярлана шүү дээ. Хэдий гэр бүл болсон ч яагаад нэгнийгээ ойлгодог найзууд гэр бүлээрээ уулзаж болохгүй гэж. Би бодоод байгаа хоорондоо сууцгаачихы гэж.
Эхнээсээ л ойлголцох хэрэгтэй. Зүгээр найзууд бол ихэнхдээ л найз чигээрээ дуусдаг... Чи үнэхээр хайртай бол нэг л өдөр тэрийгээ илчлэх л болно. Ер нь тэгэх ч хэрэгтэй шүү! Тэгээд дотроо нууцхан горьдлого тээн улам дасаж, дурлачихсан хойноо илчлээд бүтэхгүй болчихвол бүр л илүү зовно. Эртхэн илчлээд үерхэж чадахгүй бол найз хэвээрээ явчихсан нь дээр. Ер нь "хоёулаа жирийн л найзууд байя" гэж хэлсэн охид миний туршлагаар бол үнэхээр найз хэвээрээ л үлдэхийг, түүнээс хэтрэхгүй байхыг хүсч байдаг байх. Ийм тохиолдолд ядаргаа болох хэрэггүй...
Зүгээр л үнэд орж гуйлгах гэж байгаа бол үгүй, уулзахгүй г.м ааш гаргадаг байх гэж боддын.. Гэхдээ нөхцөл байдлаас хамааран өөр л дөө. Аяндаа хэн нэгэнд зүрх чинь тэмүүлээд, тэр хүний нүднээс бас ямар нэгэн зүйл мэдрэгдэж байгаа бол үгүй нь аяндаа тийм гэж сонсогдох биз
Бас нэг зүйл нь хайртай ч гэсэн зүгээр найз хэвээрээ үлдэж болдог. Тэрийг хэт хүндээр тусгаж авахгүй л байх хэрэгтэй гэж бодож байна.
Амьдралын туршлага дээрээ тулгуурлан бичсэн юм шүү. Боломжийг бүү алд, бас өөртөө боломжийн гарцыг нээж өг. Аяндаа нээгддэг зүйл гэж тэр болгон байхгүйээ.
Дахин хэлэхэд эртхэн хайраа илчлээд ойлголцоод явсан нь дээрээ. Яахав чамайг тоохгүй байлаа гээд найз биш болчихно гэсэн айдас бол зүгээр л чиний хийсвэр бодол. Чи хэт хүндээр тусгаж аваад байна гэсэн үг. Чи өөрөө хэлсэн байна чөлөөлөөд явчихаа гээд. Тэгэхээр нэгэнт найз хэвээрээ үлдсэн тохиолдолд чи л өөрийнхөө сэтгэлийг чөлөөлөөд дараагийн охинд нээчихвэл урьдны охинтойгоо урьд нь байснаараа найзууд хэвээрээ үлдэж болно.
Татагийн нэг бичлэг дээр байсан танай азиуд нэг нэгэндээ хайраа илчилдэггүй гэсэн, тэгээд та нар яаж хоорондоо нийлдэг юм бэ гэсэн гээд Цагаа ирээд, тэвчихээ болихоор аяндаа үг чинь ч, үйл хөдлөл чинь ч чамд захирагдахгүй ч байж магадгүй л байх...
Биеэ барих, өөрийгөө жолоодох чадвар чинь чамд надаас илүү байдаг болохоор хий дотроо шаналаад яваад байдаг. Энэ буруу шүү. Нөгөө бүсгүй чинь ч хүлээгээд сууж ч мэднэ. Тэгтэл нэг л өдөр өөр нэг залуутай суух болсон мэдээг чамд дуулгадаг...
Би л лав алдаагаа давтах дургүй... Тэмц гэж чи л хэлдэг шүү би хэлдэггүй
Кетчуп: Обдоо хөгшөөн мань бас далийчих уу. чи бид хоёр насаар ойролцоо байх. би ойрдоо харин ч хожуу эхнэр авч байгаа мэт санагдах болсон...
Дэлхий, монгол хоёрын эхнэр авах насжилт нөгөө алим гэдгээс шал өмнөө зүйл гэдэг шиг хот хөдөөний хувьд бас ялгаатай ойлголт. Хөдөө зах зайдуу газарт бол эртхэн нэг юм олж дэр нэгтгээд бушуухан хэдэн бацаан гаргаж л байвал адаглаад хурга ишиг хариулахаас авахуулаад ойр зуурын биеийн ажилд нэмэртэй. Эртхэн л нэг юм олж авахгүй бол хээр газарт ном уншаад боловсроод суугаад байлтай биш малчдын ажил ч ямар дуусна гэж байх биш. бусдын адуу мал, мод түлээ гээд л гарын үзүүрт л зарагдахын нэмэр.
За харин хот газрын хувьд бол өөр л дөө. ажилтай ч юм шиг үгүй ч юм шиг, сураад байгаа ч юм шиг зугаалаад ч буй юм шиг, зурагт шагайж, паб орж, номын сангаар эргэлдэхээс авахуулаад өнгө өнгийн өөр өөр сонголт ч ихтэй. Тэр хэрээрээ өдөр хоног илүү ч хурдан өнгөрөөстэй.
Миний туршлагаар бас бусдыг хараад байхнээ одоо үед хот газрын монгол эр хүний эхнэр авах тохиромжтой нас нь 22,23 – 26,27 юм байна гэж үзээд байгаа. Энэ үед дийлэнхи хүмүүс арван жил, их сургуулиа төгсчихсөн, аа бас 1-2 жил ажил хийж хариуцлага гээчийн дөртэй болчихсон байх болов уу. Үүнээс насаар бага бол мөрөөдөлдөө хөтлөгдсөн, хөнгөн хуумгай үүнээс болж амьдрал нь орвонгоор эргэх аюултай. Сахал нь ургаагүй хар нялхаараа бусдын өмнөөс хариуцлага үүрэх гэдэг чинь чанга тоглоом шүү дээ. Яахав тэр үерхэл нөхөрлөл, хааяа нэгхэн үдшийн бүжиг зугаалга, хохиролгүй секс, аяга пиво энэ тэр зугаа цэнгээ бас хүнд байлгүй л яахав.
За харин одоо хэт оройтвол ямар аюултай талаар өөрийн бодлоо хэлчих үү.
Зожигролт гэж нэг юм байна. Эмэгтэй хүн бол яахав бүр болохоо байг гэхэд нэг юмнаас хүүхэдтэй хоцорчихвол насны бөгсөнд бас ч гэж ханьтай. Эрэгтэй хүн нэг зүтгэвэл залуу насаа ганцаараа л барах юм байшд. Олон ч хүнийг мэдэх юм байна. Насны эцэст л хэцүү байх даа.
Эрэгтэй хүнийг бодвол эмс охидууд нь дурлалын асуудалд хэт яаруу ханддаг, тиймээс ихэнхи нь л хар багаасаа нэг нөхөрт бүтэлгүй бундан наачих нь элбэг байдгаас эмс охид эрчүүдийг бодвол тийм асуудал дээрээ эрт чөтгөр санаа суудаг. Чиний хорвоог ганцаар туулах өдрүүд олшрох бүрт үеийн чинь ганц бие охид улам л чөтгөр болоод байна гэсэн үг дээ. хэхэ. Эртхэн зан нь эвдэрээгүй нэг хөөрхөн охиныг өөрийн болгоод хамтдаа биесээ хүмүүжүүлээд явбал тиймээ.
Үнэндээ чи хэтэрхий боловсроод биеэ даагаад сурчихсаны дараа чиний зиндаанд очих боловсролтой, сэтгэлд чинь таарах бүсгүйчүүд тийм амар олдоно гэхэд хэцүү. ижил боловсролтой чамтай ижил бодолтой нэгэн бүсгүй таарлаа ч хэт биеэ даасан хоёр хүн хамт амьдраад эхлэхээр хэн хэн нь өөрийн дүрмээр бүгдийг зохицуулах гээд л үүнээс үүдээд хэрүүл маргаан бол байнгийн үзэгдэл болох болов уу. гэхдээ энийг бол ойлголцлоороо зохицуулж болох л байх.
Гэдэс чинь унжаад, үс чинь цайж үрчлээ нэмэгдээд л залуу нас чинь мөнх биш шүү дээ. Үржлийн насаа ч бодсон тэр, амрагийн жаргалыг арай ахиу хоног амталая гэж бодсондоо ч тэр орой гэрлэх дэмий. Хайраар өлгийдсөн үрээ амьдралын захад амжиж хүрээгүй байхад нь өдрөө хүлээсэн өвгөн болчихоод орондоо хэвтэж байх чинь сайхан зүйл ч биш.
Чиний хэлдэг эх эцгийн хайр гэж нэг юм байх. Эхнэр аваагүй хүн ээжийгээ, Үрээ хараагүй бол эцгийгээ бүрэн ойлгож ухаарч чаддаггүй юм байнаа гэж би ойрдоо дүгнээд байгаа. Хэхэ. манийх нь л бодол л доо гэхдээ.
Найз нөхөд гэж ууж идээд гүйгээд байх яах вэ. Цаадуул чинь ууж идэж нөхөрлөхийн хажуугаар амьдралаа зохицуулаад гүйгээд л байгаа. Эцсийн нэг нартай баярын өдөр цаадуул чинь гэр бүлээрээ цэцэрлэгт хүрээлэнд зугаалж байхад чамд хэн ч байхгүй. Тамхиа сороод л бусдыг хараад зогсох харамсалтай л байна байх.
Эцсийн эцэст үр хүүхэд хань ижил гэдэг чамд асар их хариуцлага, маш том тэмцэлийг авчирна. Тэмцэл дунд хүн илүү бодитой суралцана. Миний найзууд бүгд хэн нэгнийг олох үед би ганцаархнаа байдаг байлаа. Өөрөөрөө бахархана. Цувраад үр хүүхдүүд нь ч мэндэлээд эхэллээ. Би бас л ганцаараа. Бас л өөртөө баярлана. Баяр ёслолоор уулзах үед бидний тоо дандаа сондгойрдог байв. Надаас л болж тэр шүү дээ. Намайг хорих хүн байхгүй, хайрлах хүн байхгүй. Би дураараа ууж, ганцаараа харьдаг байв. Эрч чөлөө бас ганцаардал. Би хэний ч өмнө хариуцлага хүлээхгүй нь баяламаар ч тэр хэмжээгээр хэн ч надаас тэгтлээ их хамаарахгүй нь гомдмоор.
Эргээд харахад ярилцаад суухад нөхдүүд надаас илүү амьдралд бодитоор, ухаалаг ханддаг болчихсон байна. Би ямар их хоцрогдсоноо ч ойлгох шиг. хэхэ. Хадаас хадахад пифагор хэрэггүй. Хэрэгтэй хүндээ л хэрэгтэй л биз.
Обдоо хөгшөөн бид энэ хорвоо дээр өөрийн үндэсээ үлдээх гэж, хайрлаж дурлах гэж, орчлон хорвоог бишрэх гэж, амьдралын амтыг мэдрэх гэж, зовлонгийн хүндийг туулах гэж ирсэн. Тэрнээс том том хуудастай боть уншиж, мөнгө хураах гэж биш. Үнэндээ тэр их мэдлэгийг хэндээ ч гэж гайхуулахав. Цаадуул чинь чамд биш эхнэр хүүхэдээ яая гэж байгаа улс. ;P
Мэдлэг бол зүгээр л сайхан амьдрахад туслах багахаан хэмжээний хэрэгсэл. Хэрэгсэлийг бүү шүт. Зүгээр л хайрла, амьдар, эртхэн амьдралын амтыг мэдэр. Үр хүүхэдтэйгээ хамтдаа өтөл.
Муахахаха за ёстой жинхэнэ далийчихлаа. Нэг л хүний нүдээр харсан нэг л хүний бодол юм чинь авах гээх юм ч байхгүй биз дээ хөөрхий.
Үнэндээ тусад гарч, эхнэр авч, үрийн зулай үнэрлээгүй байж төсөөллөөрөө л хусчихлаа. Тиймийн тул өршөөгтий.
Бонус* - Обдоо хөгшөөн энгийнээр бодоод үзэхэд үс чинь цайраад, гүзээ чинь унжих тусам ядаж л хөөрхөн охид улам бүр холдоно шүү дээ. Залуухан царайлаг дээрээ, залуу нас гэсэн хүчтэй зэвсэгтэй дээрээ цаг хугацааг ашиглаач удахгүй хавар ч болох нь.