бичлэгХилийн заставуудаар судалгааны ажлаар явж байгаад ирлээ. Сүүлдэж бичиж байгаа бол хүлцэл өчиж байна.
Ака буугаа дүүдээ үлдээгээд
Аранз маньяаркаа бас л үлдээгээд ...
Дасал болсон хорооны хашаа руу
Дахин дахин эргэж хараад
Ховорхон гардаг эр цэргийн нулимс
Хоромхон зуур асгарсан юм
Энэ дуунуудын утгыг ч мэдэхгүй дуулдаг байж дээ. Цэрэгт байхад сайхан байв. Тухайн үедээ л ялны алба мэт санагдаж байвч эргээд бодоход сайхан байдаг юм. Миний төсөөлж байсан хилийн цэргийн алба үнэхээр бахархам ажээ. Чихээ хөлдөөчихсөн мөртлөө л үгүй гээд нууна. Ер нь барагтай юмыг бол цэргүүд их нуудаг юм билээ. Хилийн харуулын манаад үүрэг гүйцэтгэхэд ихээхэн тэсвэр тэвчээр хатуужил шаарддаг. Энэ хирээр л эр хүн болж барагтай зүйлийн өмнө шантарч няцахгүй тэр зан чанар зүлгэжин өнгө ордог. 
Би бодоод байгаа юм... цэргийн албыг эр хүн болж л өгвөл хаах хэрэгтэй гэж. Ямар ч үед нялцагнуур биш тийм л төлөв бүрддэг, ядаж л хүнээс хатуу үг дуулж, чимээгүй сонсож, шалтаг тоочихгүй байж сурна. Ер нь бодоод байхад тэр төрийн албанд ороход цэргийн алба хаах шаардлагыг шинээр хуульчилсан нь зөв юм даа .
Заставт очоод та цэрэг эрсийн бэлтгэсэн хоолыг идэхгүй бол их гомдоно. Заавал идэх л хэрэгтэй. Гараа гаргаж хийсэн тэр хоолны амттайг яана. Миний их идэхийг яана. Би лав цэрэгт байхдаа хамгийн жижигхэн нь байлаа. Чөтгөр гэж нэртэй гэж байгаа. Хэн нь ч өгсөн юм бүү мэд. Их л өлсдөгсөн. Хоол идээд байгаа хирнээ л . Угаасаа цэрэгт байхад тамхи, тариа хоол унд ч тааруу хүрэлцээ багатай байдаг. Ямар сайндаа талийгаач аав маань эргэж ирэхэд “ядарч байна уу “ гэхэд тэсгэлгүй нулимс бөн бөн асгаруулан уйлж билээ. Үүнээсээ их ичдэгсэн.
Цэргийн офицер хүн ажлаа яв цав хийдэг шиг сайхан зүйл үгүй. Учир утгагүй дүрмийн бус харилцаа, дэглэлт гэхээсээ илүү хүн чанар, харилцаан дээрээ анхаардаг, ажлаа мэддэг тийм цэргийн хүмүүст би ямар их дуртай гээч. Ийм нэг офицер бидэнтай хамт аян замд газарчилж явсан. Сайхан хүн... дуулна, хуурдана, бүжиглэнэ, ууна чиг ажлаа хийнэ чиг. Загнах үедээ загнана, уучлал гуйх үедээ уучлал гуйна, сайхан хууч хөөрнө.. хаана хязгаарлалт хаана хэтрүүлэлт хийхээ ч мэднэ. Ийм хүмүүст миний дуртайг яана. Цэрэг хүн гэж сайхан шүү. Харьцахад ч амар.
Хилийн заставт цэрэг эрсийн сайхан сэтгэл, гэнэн тэр томоогүй зан чанарыг илүүтэй олж хардаг. Дөнгөж 18, 19-хөн настай аавын гэрээс шууд ирсэн цэрэгт эрст ярих юм их бий боловч барагтай ярихгүй гээч. Нүднээс нь бүхнийг олж харна даа. Хил манаж байгаагаараа бахархах сэтгэл энэ хөвгүүдэд илэрхий. Хүний мөрөөсөл болчихсон улс. Баярлаад л угтана ...
Сайхан байлаа хилээр яваад ирэхэд .. ид хөөргөн явсан нас бодогдоод...
